Chuo Kikuu Mzumbe katika kuadhimisha Siku ya Wanawake duniani Machi 6, 2024
kimetoa msaada kwa waathirika wa mafuriko katika Wilaya ya Kilosa wenye thamani
ya Shilingi 4,135,000/-
Akiwasilisha msaada huo, Kaimu Makamu Mkuu wa Chuo Prof. Allen Mushi
amesema Mzumbe ina utamaduni wa kugusa jamii kila Maadhimisho ya Siku ya
Wanawake Duniani ambapo kwa mwaka huu msaada uliotolewa umekuwa
mahususi kwa kaya zilizokumbwa na mafuriko hapa wilayani Kilosa.
“Tumeleta sare za shule kwa watoto wa kike na kiume, madaftari, kalamu na
penseli, miswaki na dawa za meno. Vifaa vingine ni pamoja na sabuni za kufulia,
taulo za kike na chumvi.” Prof. Mushi aliweka bayana.
Aidha, amesema kuwa kwa muda wa siku tatu Chuo Kikuu Mzumbe kupitia Kituo
cha Msaada wa Kisheria kutoka Kitivo cha Sheria kimeendelea kutoa huduma za
kisheria bure katika masuala ya mirathi, ardhi, ndoa na masuala mtambuka wilayani
hapo ikiwa ni sehemu ya Maadhimisho ya Siku ya Wanawake Duniani.
Akipokea misaada hiyo, Mkuu wa Wilaya ya Kilosa Mhe. Shaka Hamdu Shaka
ameushukuru uongozi na timu ya wawakilishi kutoka Chuo Kikuu Mzumbe kwa
msaada huo na kusisitiza kuwa Wilaya hiyo imekumbwa na mafuriko makubwa toka
mwezi Desemba 2023.
“Ninakuhakikishieni kwamba msaada huu utawafikia walengwa na tunakupongezeni
sana kwa kutoa msaada wa kisheria kwa siku tatu wilayani kwetu, mwitikio ni
mkubwa na ninashauri tuweke utaratibu endelevu wa kusogeza huduma hii kwa
wananchi walau huduma hii iwe inatolewa kila mwezi” Amesisitiza Mhe. Shaka.
Amesema Chuo Kikuu Mzumbe kimechagua mahali sahihi kutoa huduma ya kisheria
kwa kuwa Kilosa ni wilaya yenye migogoro mingi ya ardhi, ndoa na mirathi; hivyo,
msaada huo ni vema ukawa endelevu ili kutatua changamoto zinazowakabili wakazi
wa wilaya hiyo.
Haya yote yanafanyika ili kuiishi kaulimbiu ya Chuo Kikuu Mzumbe: "Tujifunze kwa
maendeleo ya watu"
